१९ पुष २०८२, शनिबार ०९:१२
काठमाडौं ।
फागुन २१ गते हुने प्रतिनिधिसभा सदस्य चुनावका लागि समानुपातिकतर्फको बन्दसूची बुझाइसकेपछि राजनीतिक दलहरू प्रत्यक्षतर्फका उम्मेदवार छनोटमा केन्द्रित भएका छन्। निर्वाचन आयोगको कार्यतालिका अनुसार माघ ६ गते उम्मेदवारी मनोनयन हुने भएकाले दलहरूले जिल्लाबाट सम्भावित उम्मेदवारको नाम केन्द्रमा सिफारिस गरिरहेका छन्।
यसैक्रममा शीर्ष नेताहरू कुन निर्वाचन क्षेत्रबाट चुनाव लड्छन् भन्ने चासो बढेको छ। नेपाली कांग्रेस सभापति शेरबहादुर देउवा अन्तिमपटक गृहजिल्ला डडेल्धुराबाट उठ्ने तयारीमा छन् भने नेकपा एमाले अध्यक्ष केपी शर्मा ओली झापा–५ बाटै चुनाव लड्ने योजनामा देखिन्छन्।
तर बारम्बार निर्वाचन क्षेत्र परिवर्तन गर्दै आएका नेपाली कम्युनिस्ट पार्टी (नेकपा) का संयोजक पुष्पकमल दाहाल ‘प्रचण्ड’ यसपटक कहाँबाट उठ्छन् भन्ने विषय चासोको केन्द्र बनेको छ। १६ घटक मिलेर बनेको नेकपामा प्रचण्डको नाम देशका १६ निर्वाचन क्षेत्रबाट सिफारिस भएको छ।
कालिकोट र कास्की–३ बाट एकल सिफारिसमा परेका प्रचण्डको नाम नुवाकोट–१, सिन्धुली–२, रामेछाप, महोत्तरी–४, गोरखा–१, रोल्पा, रुकुमपूर्व र कैलाली–३ बाट पनि सिफारिस गरिएको छ।
निकटस्थ नेताहरूका अनुसार यसपटक प्रचण्डले गोरखा क्षेत्र परिवर्तन गर्ने सम्भावना छ। सिन्धुली र रुकुमपूर्वमध्ये कुनै एक क्षेत्रबाट उम्मेदवार बन्ने सम्भावना बलियो देखिएको छ। विशेषगरी रुकुमपूर्वलाई सबैभन्दा सुरक्षित क्षेत्रका रूपमा हेरिएको छ।
रुकुमपूर्वका सांसद पूर्णबहादुर घर्तीका अनुसार प्रचण्ड त्यहाँबाट उठे सबै सिफारिस गरिएका उम्मेदवार पछि हट्न सहमत छन्। पूर्वप्रधानमन्त्री आफैं आएपछि जिल्लाको विकासले गति लिने अपेक्षा स्थानीय नेता, कार्यकर्ता र मतदातामा बढेको उनको भनाइ छ।
यद्यपि, प्रचण्डले अहिलेसम्म अन्तिम निर्णय सार्वजनिक गरेका छैनन्। पुसको अन्त्यतिर मात्रै उम्मेदवारीबारे टुंगो लगाउने उनको योजना रहेको बताइएको छ।
प्रतिकृया दिनुहोस्