रवि लामिछानेको स्वास्थ्य स्थिर, शिक्षण अस्पतालमा उपचार जारी

---

काठमाडौँ। राष्ट्रिय स्वतन्त्र पार्टीका सभापति रवि लामिछानेको स्वास्थ्य अवस्था सामान्य रहेको त्रिभुवन विश्वविद्यालय शिक्षण अस्पतालले जनाएको छ। अस्पतालका अनुसार उनको देब्रे खुट्टामा देखिएको संक्रमणका कारण केही दिनदेखि उपचार भइरहेको हो।

माघ ५ गते जनकपुरमा आयोजित एक कार्यक्रममा सहभागी हुने क्रममा खुट्टामा चोट लागेपछि समस्या सुरु भएको अस्पतालले जनाएको छ। प्रारम्भिक रूपमा औषधि सेवन गर्दा पनि अवस्था नसम्हालिएपछि खुट्टामा सेलुलाइटिस देखिएको र माघ १३ गते हाडजोर्नी विभागमा भर्ना गरिएको अस्पतालको विज्ञप्तिमा उल्लेख छ।

अस्पतालका प्रवक्ता डा. गोपाल सेडाईका अनुसार लामिछानेलाई नशामार्फत आईभी एन्टिबायोटिक्स दिइँदै उपचार भइरहेको छ र अवस्था हाल स्थिर छ।

यसैबीच, सामाजिक सञ्जालमा फैलिएका केही तस्वीरहरू शिक्षण अस्पतालसँग सम्बन्धित नभएको भन्दै अस्पतालले यस्ता सामग्रीप्रति सचेत रहन सर्वसाधारणलाई आग्रह गरेको छ।