गृहमन्त्रालयमा सुधनको पुनरागमन सम्भव? छानबिनपछि ‘क्लीनचिट’को दाबी

---

काठमाडौं । गृहमन्त्री पदबाट राजीनामा दिएका सुधन गुरुङ पुनः गृहमन्त्रालय फर्किन सक्ने चर्चा राजनीतिक वृत्तमा तीव्र बनेको छ। उनी निकट स्रोतहरूले छानबिनपछि ‘क्लीनचिट’ पाएर पुनः जिम्मेवारी सम्हाल्ने दाबी गरेका छन्।

विवादित व्यवसायी दिपक भट्टसँग व्यापारिक सम्बन्ध रहेको खुलासापछि दबाबमा परेका गुरुङले हिजो पदबाट राजीनामा दिएका थिए। राजीनामा घोषणा गर्दै उनले आफूमाथि निष्पक्ष छानबिन गर्न चुनौती समेत दिएका थिए।

राजीनामापछि को नयाँ गृहमन्त्री बन्छ भन्नेबारे चर्चा चुलिएको छ। सामाजिक सञ्जालमा विभिन्न नामहरू सार्वजनिक भए पनि प्रधानमन्त्री बालेन्द्र साह ले तत्काल नयाँ गृहमन्त्री नियुक्त नगर्ने संकेत स्रोतहरूले दिएका छन्।

यद्यपि, आज बसेको मन्त्रिपरिषद् बैठकमा गुरुङमाथि उठेका विषयमा छानबिन समिति गठन हुने चर्चा भए पनि सरकारका प्रवक्ता तथा शिक्षामन्त्री सस्मित पोखरेल ले सार्वजनिक गरेको निर्णयमा यसबारे कुनै उल्लेख गरिएको छैन।

राजीनामापछि गुरुङ गृह मन्त्रालय पुगेका थिए, जहाँ करिब तीन घण्टा बिताउँदै उनले औपचारिक बिदाइ लिए। सो क्रममा नेपाल प्रहरीका महानिरीक्षक दानबहादुर कार्की लगायत सुरक्षा निकायका प्रमुखहरू उपस्थित थिए। बिदाइका क्रममा गुरुङ भावुक देखिएका थिए।

बिदाइपछि उनले सरकारी सवारी मन्त्रालयमै छाडेर निजी गाडीमार्फत सिंहदरबारबाट बाहिरिएका थिए। साथै, उनले सरकारी निवाससमेत त्यागेर सितापाइलास्थित निजी अपार्टमेन्टमा सरेको स्रोतले जनाएको छ।

गुरुङ निकट स्रोतहरूका अनुसार सरकार चाँडै छानबिन समिति गठन गर्ने र केही समयमै उनलाई निर्दोष ठहर गर्ने अपेक्षा गरिएको छ। एक स्रोतले भन्यो, “प्रधानमन्त्रीले गृह मन्त्रालय आफैंसँग राख्नुभएको छ, त्यसैले तत्काल नयाँ नियुक्ति हुने छैन। सुधन गुरुङ नै केही दिनमा फर्किनुहुनेछ।”

तर, प्रधानमन्त्री निकट स्रोतले यस विषयमा कुनै स्पष्ट धारणा सार्वजनिक गर्न चाहेन। अर्कोतर्फ, सत्तारुढ दल निकट स्रोतहरू भने छानबिनको नतिजामै सबै निर्भर रहने बताउँछन्। “यदि निर्दोष प्रमाणित भए फर्किने सम्भावना रहन्छ, अन्यथा पुनरागमन सहज छैन,” स्रोतले भन्यो।

हालका लागि गृहमन्त्री पद रिक्त रहँदा सरकारको आगामी कदम र छानबिनको निष्कर्षप्रति सबैको चासो केन्द्रित भएको छ।