कम्युनिष्ट एकताबाट समाजवादको नयाँ यात्रा सुरु गर्ने प्रचण्डको घोषणा

नेपाल कम्युनिष्ट पार्टी (नेकपा) का संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ ले क्रान्तिको लक्ष्य अझै पूरा नभएको बताउँदै कम्युनिष्ट शक्तिहरूलाई एकताबद्ध गरेर समाजवादतर्फ अघि बढ्ने बताएका छन्।

मुसिकोट नगरपालिका–१० खर्सुपानीमा आयोजित शहीद कामी बुढा स्मृति पार्क उद्घाटन कार्यक्रममा बोल्दै उनले विभिन्न कम्युनिष्ट समूहलाई एक ठाउँमा ल्याएर नयाँ राजनीतिक यात्रा सुरु गरिएको उल्लेख गरे। “हामी समाजवादको यात्रामा अगाडि बढिरहेका छौं, त्यसका लागि विभिन्न कम्युनिष्ट शक्तिहरूलाई एकताबद्ध गरेर नयाँ ढंगले अघि बढ्ने प्रयास गरेका छौं,” उनले भने।

प्रचण्डले अब बाँकी रहेका कम्युनिष्ट शक्तिहरूलाई समेत समेट्दै व्यापक एकता गर्ने योजना रहेको स्पष्ट पारे। साथै, उनले विगतका राजनीतिक उपलब्धिलाई संस्थागत गर्न शान्ति प्रक्रिया र संविधानसभाको पक्षमा रहेका सबै राजनीतिक शक्तिहरूसँग सहकार्य गर्दै अघि बढ्ने धारणा व्यक्त गरे।

उनले देशलाई स्थायित्व र समृद्धितर्फ लैजान व्यापक राजनीतिक सहमति आवश्यक रहेको उल्लेख गर्दै एकतामार्फत समाजवादको आधार निर्माण गर्ने प्रतिबद्धता जनाए।