भोटेकोशी पुनर्निर्माण र पूर्वाधार लगानीका लागि सहयोग खोज्दै अर्थमन्त्री वाग्ले अमेरिका पुगे

---

अर्थमन्त्री डा. स्वर्णिम वाग्ले दुई सदस्यीय प्रतिनिधिमण्डलको नेतृत्व गर्दै अमेरिका पुगेका छन्। वासिङ्टन डीसीमा कार्यवाहक नेपाली राजदूत शरदराज आरन र दूतावासका अधिकारीले उनको स्वागत गरेका थिए।

अमेरिका बसाइमा वाग्लेले अमेरिकी ट्रेजरी सचिव स्कट बेसेन्ट र विश्व बैंक समूहका अध्यक्ष अजय बङ्गासँग भेट्ने कार्यक्रम छ। छलफलमा भोटेकोशी क्षेत्रमा बाढीले क्षति पुर्‍याएका पूर्वाधारको पुनर्निर्माणका लागि सहयोग, आर्थिक सुधार र नेपालको वित्तीय प्रणाली सुधारका विषय उठ्नेछन्। नेपाललाई एफएटीएफको ग्रे सूचीबाट बाहिर निकाल्ने प्रयास पनि एजेन्डामा रहने जनाइएको छ।

सडक तथा विद्युत् प्रसारण लाइनजस्ता पूर्वाधारमा लगानी जुटाउन उनले अमेरिकी विकास वित्त निगम र निजी क्षेत्रका लगानीकर्तासँग पनि भेट गर्ने कार्यक्रम छ।