रास्वपाले आज बृहत्तर एकता घोषणा सभा गर्दै, बालेन शाह र उज्यालो नेपालसँगको सहकार्य औपचारिक

काठमाडौँ

  काठमाडौँ महानगरपालिकाका मेयर बालेन्द्र शाह (बालेन), उज्यालो नेपाल पार्टी र अन्य समूहबाट आएका नेता–कार्यकर्ताको व्यवस्थापनपछि राष्ट्रिय स्वतन्त्र पार्टी (रास्वपा) ले आज बृहत्तर एकता घोषणा सभा गर्ने भएको छ।

रास्वपाले आइतबार जारी गरेको विज्ञप्तिअनुसार आज दिउँसो १ बजे काठमाडौँस्थित राष्ट्रियसभा गृहमा एकताको औपचारिक घोषणा गरिनेछ। सभामार्फत एकता प्रक्रियालाई पूर्णता दिँदै आगामी राजनीतिक कार्यदिशाबारे पनि स्पष्ट पारिने पार्टीले जनाएको छ।

पुस १३ र १४ गते रास्वपाले काठमाडौँका मेयर बालेन शाह र ऊर्जामन्त्री कुलमान घिसिङ नेतृत्वको उज्यालो नेपाल पार्टीसँग एकता गर्ने सहमति गरेको थियो। सो सहमतिपछि पार्टीमा आएका नयाँ समूह र व्यक्तिहरूको भूमिकालाई व्यवस्थित गर्ने प्रक्रिया अघि बढाइएको थियो।

यसैबीच, आइतबार बसेको रास्वपाको बैठकले पार्टीमा समाहित भएका नेता–कार्यकर्ताको व्यवस्थापनका लागि विभिन्न पदाधिकारी थप गर्ने निर्णय गर्दै केन्द्रीय समितिमा मनोनयनसमेत गरेको छ। आजको घोषणा सभालाई रास्वपाको राजनीतिक एकता र आगामी चुनावी तयारीको महत्वपूर्ण चरणका रूपमा हेरिएको छ।