बालुवाटारमा कार्की–ओलीबीच तीन घण्टाको भेटवार्ता:चुनाव केन्द्रित संवाद

---

काठमाडौं ।

   प्रधानमन्त्री सुशीला कार्की र नेकपा एमालेका अध्यक्ष केपी शर्मा ओलीबीच बिहीबार बालुवाटारमा करिब तीन घण्टा लामो एकान्त भेटवार्ता भएको छ। पछिल्लो समय चुनावी प्रक्रिया र राजनीतिक घटनाक्रमलाई लिएर दुवै पक्षबीच संवाद क्रमशः सहज बन्दै गएको सन्दर्भमा यो भेटलाई अर्थपूर्ण रूपमा हेरिएको छ।

बिहीबार बिहान करिब ११ बजे ओली कुनै पनि पार्टी नेतासहित नभई स्वकीय सचिव राजेश बज्राचार्यसँग बालुवाटार पुगेका थिए। प्रधानमन्त्री कार्कीका पति दुर्गा सुवेदी बिरामी भई दिल्लीमा उपचाररत रहेको जानकारी पाएपछि ओलीले स्वास्थ्य अवस्थाबारे चासो व्यक्त गर्दै भेटको वातावरण बनेको बताइन्छ।

सुरुमा पारिवारिक अवस्थाबारे कुराकानी भएपछि प्रधानमन्त्री र ओलीबीच एक्लाएक्लै लामो छलफल भएको थियो। छलफलमा प्रधानमन्त्री कार्कीले तोकिएको मितिमै निर्वाचन सम्पन्न गर्न सरकार प्रतिबद्ध रहेको र त्यसका लागि सबै राजनीतिक दलको सहयोग अपरिहार्य रहेको स्पष्ट पारेकी थिइन्।

प्रधानमन्त्रीले एमालेले निर्वाचन आयोगमा समयमै दल दर्ता गराएको, समानुपातिक सूची पनि व्यवस्थित रूपमा बुझाएको प्रसंग उठाउँदै चुनावप्रति एमालेले देखाएको व्यवहारिक प्रतिबद्धताको प्रशंसा गरेको स्रोतको भनाइ छ। यसअघिका बैठकमा समेत एमालेले तोकिएकै कार्यतालिकाअनुसार अघि बढ्न सकिने धारणा राखेको स्मरण गराइएको थियो।

यद्यपि, ओलीले आफ्नो सार्वजनिक राजनीतिक अडानमा कुनै परिवर्तन नगरेको बताइन्छ। उनले संसद् पुनर्स्थापनाबाटै राजनीतिक निकास सम्भव हुने धारणा पुनः दोहोर्‍याएका थिए। सरकार पक्षले भने उक्त अडानलाई एमालेको चुनावी एजेन्डाका रूपमा मात्रै लिएको बुझाइ छ।

एमालेले हालै महाधिवेशन सम्पन्न गरी उम्मेदवार सिफारिस प्रक्रिया तीव्र बनाइरहेका बेला ओलीले सरकार चुनावप्रति कति दृढ छ भन्ने बुझ्न पनि भेटलाई महत्व दिएको प्रधानमन्त्री निकट स्रोतहरू बताउँछन्। चुनाव सर्ने हो भने आफ्ना राजनीतिक एजेन्डा अघि सार्ने ठाउँ रहने भए पनि निर्वाचन तोकिएको मितिमै भए एमालेको भूमिकामाथि प्रश्न उठ्न नहुने ओलीको चासो रहेको बताइन्छ।

प्रधानमन्त्री कार्की भने कुनै पनि हालतमा फागुन २१ गतेको निर्वाचन तालिका तलमाथि नहुने अडानमा देखिन्छिन्। यही कारण चुनावी सरकारमा बसेर प्रत्यक्ष राजनीतिमा होमिन चाहने मन्त्रीहरूलाई समयमै निर्णय लिन संकेत गरिसकेको चर्चा छ।

सरकारले चुनावमा अवरोध नआओस् भन्ने उद्देश्यले विभिन्न राजनीतिक समूहसँग संवाद जारी राखेको छ। निर्वाचन प्रहरी भर्ना प्रक्रिया सुरु भइसकेको छ भने मतपत्र छपाइ अन्तिम चरणमा पुगेको छ।

एमालेका एक वरिष्ठ नेताका अनुसार पछिल्लो भेटले दुवै पक्षबीच टकरावभन्दा संवादको आवश्यकता बढेको संकेत गर्छ। “सरकारलाई अब दलहरूसँग सहकार्य नगरी चुनाव सम्भव छैन भन्ने बुझाइ बनेको छ,” ती नेताले भने।

प्रधानमन्त्री र ओलीबीचको यो भेट चुनावलाई केन्द्रमा राखेर भएको र एमालेले निर्वाचन प्रक्रियामा अवरोध नगर्ने प्रतिबद्धता पुनः दोहोर्‍याएको प्रधानमन्त्रीका प्रेस संयोजक रामबहादुर रावलले बताएका छन्।