शहीदहरूले रोपेको बीउबाट लोकतान्त्रिक अधिकार फलेको छ : ओली

---

काठमाडौं। नेकपा एमालेका अध्यक्ष केपी शर्मा ओलीले शहीद दिवसको अवसरमा शुभकामना सन्देश दिँदै आज देशले उपभोग गरिरहेका लोकतान्त्रिक अधिकारको जग शहीदहरूको त्याग र बलिदानबाट बनेको बताएका छन्।

सन्देशमार्फत उनले १९९७ सालका शहीदहरूको योगदान स्मरण गर्दै निरंकुश र जहानियाँ शासनविरुद्ध सुरु भएको आन्दोलनले नै लोकतान्त्रिक चेतनाको बीउ रोपेको उल्लेख गरे।

अध्यक्ष ओलीले शुक्रराज शास्त्री, धर्मभक्त माथेमा, दशरथ चन्द र गंगालाल श्रेष्ठलाई राणा शासनले मृत्युदण्ड दिएको ऐतिहासिक घटनालाई सम्झिँदै, ती बलिदानहरूले देशलाई स्वतन्त्रता र अधिकारको बाटोमा अघि बढाएको बताए।

उनका अनुसार निरंकुश व्यवस्थाको अन्त्य र लोकतान्त्रिक अधिकारको स्थापनामा कम्युनिष्ट र नेपाली कांग्रेसको संयुक्त आन्दोलनले निर्णायक भूमिका खेलेको थियो। समाजले आज भोगिरहेको स्वतन्त्रता र अधिकार त्यही संघर्षको परिणाम भएको उनको भनाइ छ।

ओलीले शहीद दिवसलाई केवल क्यालेन्डरको एउटा मितिमा सीमित नराखी, स्वतन्त्रता कसरी प्राप्त भयो भन्ने कुरा आत्मसमीक्षा गर्ने दिनका रूपमा लिनुपर्ने बताए। उनले राष्ट्रिय स्वाधीनता र लोकतन्त्रको रक्षाका लागि सधैं अडिग रहने प्रतिवद्धता समेत व्यक्त गरेका छन्।