नेतृत्व आफैं सम्हाल्न राजनीतिमा आएका हौं : कुलमान घिसिङ

---

उज्यालो नेपाल पार्टीका अध्यक्ष कुलमान घिसिङले आफूहरू कसैलाई प्रधानमन्त्री बनाउने उद्देश्यले होइन, देशको नेतृत्व आफैं सम्हाल्ने लक्ष्यसहित राजनीतिमा प्रवेश गरेको बताएका छन्। चुनावी कार्यक्रमका लागि जनकपुरधाम आइपुगेका घिसिङले बुधबार बिहान सञ्चारकर्मीहरूसँग कुरा गर्दै यस्तो धारणा राखेका हुन्।

उनले भने, ‘हामी अरूका लागि बाटो बनाउने होइन, देशलाई सही दिशामा लैजान आएका हौं। नेतृत्व हाम्रो हातमा लिएर वास्तविक परिवर्तन गर्ने हाम्रो संकल्प हो।’

घिसिङले उज्यालो नेपाल पार्टी धेरै निर्वाचन क्षेत्रमा बलियो प्रतिस्पर्धामा रहेको दाबी गर्दै यसपटक मतदाताले व्यक्ति वा पुराना दलभन्दा देशको भविष्यलाई केन्द्रमा राखेर मतदान गर्नुपर्ने बताए।

जेनजी आन्दोलनपछि पैदा भएको नयाँ राजनीतिक चेतनाको प्रतिनिधित्व उज्यालो नेपाल पार्टीले गरेको उनको भनाइ थियो। उनले नयाँ शक्तिलाई विश्वास गरेर काम गर्ने अवसर दिन आग्रह गर्दै भने, ‘देशको समृद्धिका लागि अब नयाँ सोच र नयाँ नेतृत्व आवश्यक छ।’