२६ फाल्गुन २०८२, मंगलवार १४:४२
काठमाडौं, २५ फागुन। नेपाली कांग्रेसका नेता चन्द्र भण्डारीले पार्टी सभापति गगन कुमार थापालाई राजीनामा नदिई छिटो महाधिवेशनमा जाने बाटो रोज्न सुझाव दिएका छन्।
सामाजिक सञ्जालमार्फत आफ्नो धारणा सार्वजनिक गर्दै उनले अहिलेको समय जिम्मेवारीबाट भाग्ने नभई पूरा गर्ने समय भएको उल्लेख गरे। “राजीनामा दिने होइन, जिम्मेवारी पूरा गर्ने समय हो,” उनले लेखेका छन्।
भण्डारीका अनुसार समस्या देखेपछि नेतृत्वले त्यसबाट टाढा भाग्नु हुँदैन, बरु उपचार गरेर संगठन जोगाउनु नै साँचो नेतृत्वको कर्तव्य हो। उनले कांग्रेसको पछिल्लो चुनाव नियमित प्रक्रियाअनुसार नभएको उल्लेख गर्दै नैतिकताको नाममा राजीनामा दिनुभन्दा छिटो महाधिवेशनमा जानु नै उचित हुने बताए।
उनले अहिलेको परिस्थितिमा नेपाली कांग्रेसलाई जोगाउनु नै ठूलो नैतिक जिम्मेवारी भएको पनि बताएका छन्। भण्डारीका अनुसार पछिल्लो समय युवापुस्ता कांग्रेसबाट टाढिँदै गएको कटु यथार्थ रहेको छ, त्यसैले पार्टीलाई अझ सशक्त बनाउन नेतृत्वले पहल गर्नुपर्ने आवश्यकता छ।
“यस्तो बेला पार्टीलाई औषधि खुवाउनुपर्ने हुन्छ, छोडेर हिँड्न हुँदैन,” उनले भनेका छन्।
भण्डारीले इच्छाशक्ति र साहस भए नेपाली कांग्रेसलाई पुनः मजबुत बनाउन सम्भव रहेको विश्वास समेत व्यक्त गरेका छन्।
Advertisement
प्रतिकृया दिनुहोस्