गगन थापाले कांग्रेसको आगामी पाँच वर्षको राजनीतिक दस्तावेज पेस गर्ने

---

काठमाडौँ । नेपाली कांग्रेसको १५औँ महाधिवेशनमा सभापति गगन थापाले आगामी पाँच वर्षका लागि पार्टीको राजनीतिक दस्तावेज प्रस्तुत गर्ने तयारी गरेका छन्। कांग्रेस प्रवक्ता देवराज चालिसेका अनुसार दस्तावेजमा राजनीतिक दिशा, अर्थनीति, उत्पादन, रोजगारी र विदेश नीतिका विषय समेटिनेछन्।

उपसभापति विश्वप्रकाश शर्माले समसामयिक राजनीति र पार्टीको संरचनागत सुधारबारे छुट्टै प्रतिवेदन पेस गर्नेछन्। विधान संशोधनमार्फत युवा, महिला, पिछडिएका वर्ग र विदेशमा रहेका नेपालीलाई पार्टी संरचनामा समेट्ने विषय पनि छलफलमा आउने बताइएको छ।

खुलामञ्चमा आज दिउँसो २ बजे उद्घाटन हुने महाधिवेशनमा करिब ७,५०० प्रतिनिधि सहभागी हुने अपेक्षा छ। प्रतिनिधिहरूले आगामी पाँच वर्षको नीति, संगठनको स्वरूप र नेतृत्वबारे निर्णय गर्नेछन्।