राजु गैरेमाथि आफ्नै पार्टीभित्र आक्रमण, राप्रपा नेतृत्वको मौनताले उठायो गम्भीर प्रश्न

---

काठमाडौँ,

राष्ट्रिय प्रजातन्त्र पार्टी (राप्रपा) मा १८ वर्षदेखि धार्मिक एजेन्डा र राजसंस्थाको पक्षमा समर्पित रहँदै सक्रिय राजनीतिमा रहेका राजु गैरे आफ्नै पार्टीभित्रैको आन्तरिक राजनीति र आक्रमणको शिकार बनेका छन्। पार्टीभित्र न्यायको खोजीमा रहेका गैरे अहिले नेतृत्वको मौनता र प्रहरी प्रशासनको निष्क्रियताविरुद्ध आक्रोशित छन्।

गत बिहीबार, राप्रपा अध्यक्ष राजेन्द्र लिङ्देनका स्वकीय सचिव छत्र खडायतले सामाजिक सञ्जालमा अध्यक्षको आलोचना गरेको निहुँमा गैरेमाथि आक्रमण गरेका थिए। पार्टी कार्यालय नजिकैको छाप्रो रेस्टुरेन्टमा चिया खाइरहेका बेला हेल्मेटले टाउकोमा प्रहार गरिएको थियो। घटनाको भिडियो अहिले सामाजिक सञ्जाल र मिडियामा भाइरल भइसकेको छ।

घटनापछि गैरेले प्रहरीमा उजुरी दिएका थिए तर अहिलेसम्म किटानी जाहेरी दर्ता हुन सकेको छैन। पीडित गैरेले आरोप लगाएका छन् कि प्रहरी प्रशासन राजनीतिक दबाबमा काम गरिरहेको छ र अध्यक्ष लिङ्देनकै निर्देशनमा आक्रमणकारीलाई संरक्षण दिइरहेको छ।

“प्रहरी प्रशासनले राजनीतिक हस्तक्षेपमा चलिरहेको छ। गुन्डालाई संरक्षण दिन प्रहरी तयार छ, तर पीडितको आवाज सुनिदैन,” गैरेको गुनासो छ।

पार्टी सचिवालयमा औपचारिक उजुरी दर्ता गरिए पनि हालसम्म कुनै प्रतिक्रिया आएको छैन। गैरेले पार्टी नेतृत्वप्रति निराशा व्यक्त गर्दै भने, “पार्टीभित्र अहिले विचार राख्ने कार्यकर्तालाई छानी–छानी हटाउने, डराउने, धम्क्याउने प्रवृत्ति बढेको छ। विचार व्यक्त गर्ने दुश्मन, चाकरी गर्ने आफ्ना भन्ने प्रवृत्तिले पार्टी भित्र सडानको अवस्था सिर्जना भएको छ।”

आरोपित छत्र खडायत हालै सम्पन्न एक धार्मिक कार्यक्रममा अध्यक्ष लिङ्देनकै साथ सार्वजनिक रूपमा देखिएका छन्। गैरेको भनाइमा अनुसार, “आक्रमणको समयमा अध्यक्षले नै ‘दुई झापड हानेर आउनु’ भन्ने निर्देशन दिएका थिए। यस्तो स्पष्ट प्रमाण हुँदासमेत अध्यक्ष मौन छन् र पीडितको अवस्था बारे कुनै चासो व्यक्त गरिएको छैन।”

गैरेले आफू प्रदेश सभा उम्मेदवार समेत रहिसकेको भन्दै यस्तो सम्मानजनक स्थानमा रहेका कार्यकर्तामाथि हिंसात्मक व्यवहार हुनु र पार्टीले कुनै चासो नदेखाउनु गम्भीर विषय भएको बताए। उनले थपे, “प्रहरी मुर्गदर्शक बनेको छ, उजुरी लिन आनाकानी भइरहेको छ। यसले स्पष्ट संकेत गर्छ कि अध्यक्षकै संरक्षणमा सबै भइरहेका छन्।”

गैरेले अब कानुनी प्रक्रिया अघि बढाउने र न्याय नपाए अनशनमा बस्ने चेतावनी पनि दिएका छन्।