राजसंस्था पुनःस्थापना सहमतिको बाटोबाट मात्र सम्भव: राप्रपा

---

राष्ट्रिय प्रजातन्त्र पार्टी (राप्रपा) ले राजसंस्था जनमतसंग्रह होइन, राष्ट्रिय सहमति बाट पुनःस्थापित हुनुपर्ने धारणा सार्वजनिक गरेको छ।

शुक्रबार सम्पन्न केन्द्रीय कार्यसमितिको बैठकका निर्णय सार्वजनिक गर्दै अध्यक्ष राजेन्द्र लिङदेनले राप्रपाको परिकल्पनाको राजसंस्था पूर्ण संवैधानिक हुने र यो मुद्दा अल्पमत–बहुमतबाट होइन, सबैको सहमतिबाट समाधान हुनुपर्ने बताए।

लिङदेनका अनुसार राजा कुनै एक दलको नभई देशको साझा संस्था हुन्छ, त्यसैले जनमतसंग्रह वा हिंसात्मक मार्ग सही उपाय होइन।

बैठकले विभिन्न प्रतिवेदन संशोधनसहित पारित गरेको र पुस महिनामा देशभर जनसंवाद तथा जनप्रदर्शन गरी नयाँ राजनीतिक समझदारीको दबाब सिर्जना गर्ने निर्णय पनि गरेको छ।

लिङदेनले जेन–जी पुस्ताले उठाएका माग सम्बोधन नगरी चुनावमा जाने हो भने देश समस्याबाट ननिस्कने चेतावनी दिए। केही सहमतिहरू अपूर्ण रहेको र विदेशमा रहेका नेपालीलाई विदेशबाटै मतदान गर्न मिल्ने व्यवस्था गर्न आग्रह पनि गरे।