नेपाललाई बंगलादेश बन्न दिन हुँदैन : प्रधानमन्त्री सुशीला कार्की

---

अन्तरिम सरकारकी प्रधानमन्त्री सुशीला कार्कीले मुलुकलाई बंगलादेश जस्तो अवस्था बन्न दिन नहुने बताएकी छन्। बाह्रखरी कथा प्रतियोगिताका विजेता घोषणा तथा पुरस्कार वितरण समारोहलाई सम्बोधन गर्दै उनले यस्तो धारणा व्यक्त गरेकी हुन्।

प्रधानमन्त्री कार्कीले अन्तरिम सरकार ‘अचानो’ जस्तो अवस्थामा पुगेको टिप्पणी गर्दै राजनीतिक दल र जेन–जी समूहबाट दिनदिनै सरकार छोड्न दबाब र गालीगलौज भइरहेको बताइन्। सबैतिरबाट आलोचना आइरहेकाले दिग्दारी लाग्ने अवस्था रहेको उनले उल्लेख गरिन्।

उनले भनिन्, “हामी अचानो जस्तो पो रहेछौँ। राजनीतिक दलले पनि गाली गर्छन्, आज छोड भन्छन्, भोलि छोड भन्छन्। जेन–जीले पनि आजै छोड, भोलि छोड भन्छ। छोड्यौँ भने भोलिपल्ट फेरि ‘थुक्क, पालो त दिएको थियो नि’ भन्ने भाष्य आउँछ। हामी त पेण्डुलम जस्तै भयौँ।”

प्रधानमन्त्री कार्कीले सबै आलोचना सहँदै धैर्यका साथ काम गरिरहेको बताइन्। उनले युवामाझ निर्वाचनको आवश्यकता नै छैन भन्ने भाषा आउन थालेकोप्रति चिन्ता व्यक्त गर्दै मुलुक अस्थिरतातर्फ नजाओस् भन्नेमा सरकार सचेत रहेको बताइन्।

“कतै जाँदा पनि सुख नहुने अवस्था छ। २५–३० वटा जेन–जी समूहले फरक–फरक सुझाव दिनुहुन्छ,” उनले भनिन्, “तर हाम्रो एउटै लक्ष्य छ—मुलुक बंगलादेश नबनोस्।”

उनले आफूहरू अहिले निकै कठिन परिस्थितिमा रहेर मुलुकलाई स्थिर राख्ने प्रयासमा जुटेको बताइन्।