जेनजी कुनै दलको पक्षमा छैन, राष्ट्रहितका लागि वैकल्पिक शक्तिलाई एकताबद्ध गरिरहेका छौँ : सुदन गुरुङ

---

काठमाडौँ ।

जेनजी प्रतिनिधि सुदन गुरुङले आफूहरू कुनै पनि राजनीतिक दलमा संलग्न नरहेको स्पष्ट गर्दै राष्ट्रको हित र जनताको इच्छालाई सर्वोपरि राखेर वैकल्पिक शक्तिहरूलाई एकताबद्ध गर्ने अभियानमा लागेको बताएका छन्।

शनिबार सामाजिक सञ्जाल फेसबुकमार्फत धारणा सार्वजनिक गर्दै गुरुङले सत्ता, पद वा व्यक्तिगत प्रसिद्धिले जेनजी आन्दोलनलाई आकर्षित नगर्ने उल्लेख गरेका छन्। उनले बलिदानको जगमा उभिएर सत्ता प्राप्त गर्ने सोच राख्नेहरूलाई जेनजीको जनादेश सम्झन आग्रह गरेका छन्।

‘हाम्रो दाजुभाइ र दिदीबहिनीको बलिदानमा उभिएर सत्तामा पुग्ने सपना देख्नेहरूले जेनजीको जनादेश बुझ्नुपर्छ,’ गुरुङले लेखेका छन्।

उनका अनुसार जेनजी आन्दोलनले साहसी, इमानदार र प्रतिबद्ध युवालाई नेतृत्व र सम्मानजनक स्थान दिन सक्ने राजनीतिक शक्तिलाई मात्र समर्थन गर्नेछ। साथै, सहिद तथा घाइतेहरूको बलिदानलाई प्राथमिकतामा राख्ने राजनीतिक शक्तिप्रति मात्र जेनजीको स्वीकार्यता रहने उनको भनाइ छ।

गुरुङले जेनजी कुनै दलको भातृ संगठन वा चुनावी औजार नभएको स्पष्ट गर्दै जनभावनाअनुसार देशलाई सही दिशामा लैजान सक्ने वैकल्पिक शक्तिहरूलाई एक ठाउँमा ल्याउने प्रयास जारी रहने बताए।