एमाले सचिवालय बैठक भोलि, समानुपातिक उम्मेदवार सूची तयार गर्ने तयारी

---

काठमाडौं,

 नेकपा (एमाले) ले सचिवालय बैठक बोलाएको छ। भोलि (आइतबार) बिहान ११ बजे पार्टी मुख्यालय च्यासलमा सचिवालय बैठक बस्ने तय भएको हो।

बैठकमा प्रतिनिधिसभा निर्वाचनका लागि समानुपातिकतर्फको उम्मेदवार सूची तयार गर्ने विषयमा छलफल हुने बताइएको छ। निर्वाचन कार्यतालिका नजिकिँदै जाँदा एमालेले संगठनात्मक र चुनावी तयारीलाई तीव्र बनाएको देखिन्छ।

यसअघि प्रतिनिधिसभा पुनःस्थापनाको वकालत गर्दै आएको एमालेले समानान्तर रूपमा निर्वाचन कार्यतालिकालाई पनि पछ्याइरहेको छ। पार्टी अध्यक्ष केपी शर्मा ओलीले पटक–पटक चुनाव नहुने र निकासका लागि संसद् पुनःस्थापना हुने ठोकुवा गर्दै आएका छन्।

तर निर्वाचनको मिति नजिकिँदै जाँदा एमालेले चुनावी तयारीलाई पनि अगाडि बढाएको छ। समानुपातिक उम्मेदवार सूची तयारीका लागि सचिवालय बैठकलाई महत्वपूर्ण मानिएको छ।