चुनाव लड्न बालेनको राजीनामाको तयारी, काठमाडौं महानगरमा उपनिर्वाचन हुने सम्भावना

---

काठमाडौं । काठमाडौं महानगरपालिकाका मेयर बालेन शाहले फागुन २१ गते हुने प्रतिनिधिसभा निर्वाचन लड्न राष्ट्रिय स्वतन्त्र पार्टी (रास्वपा)सँग सहमति गरेपछि पदबाट राजीनामा दिने तयारी गरेका छन्।

बालेनले आगामी एक–दुई साताभित्र राजीनामा दिए मेयर पदको कार्यकाल करिब १६ महिना बाँकी रहनेछ। स्थानीय तह निर्वाचन ऐनअनुसार जनप्रतिनिधिको पद रिक्त भई बाँकी अवधि एक वर्षभन्दा बढी भए उपनिर्वाचन गर्नुपर्ने कानुनी व्यवस्था छ। यस आधारमा काठमाडौं महानगरपालिकामा उपनिर्वाचन हुने सम्भावना रहेको छ।

उपनिर्वाचनको मिति तत्कालीन सरकारले निर्वाचन आयोगसँग परामर्श गरी तय गर्ने व्यवस्था छ। आयोगका एक अधिकारीका अनुसार कति स्थानमा उपनिर्वाचन आवश्यक छ भन्ने मूल्यांकनपछि मिति निर्धारण गरिन्छ।

मेयर पद रिक्त भएको अवस्थामा नयाँ मेयर निर्वाचित नहुँदासम्म उपमेयरले कार्यवाहकको जिम्मेवारी सम्हाल्ने कानुनी व्यवस्था छ। हाल काठमाडौं महानगरपालिकाकी उपमेयर सुनीता डंगोल (नेकपा एमाले) कार्यवाहक मेयर हुनेछन्।