कुलमान घिसिङ रास्वपाको उपसभापति बन्ने भएपछि मन्त्री पदबारे विवाद

---

काठमाडौँ । ऊर्जा, जलस्रोत तथा सिँचाइमन्त्री कुलमान घिसिङ राष्ट्रिय स्वतन्त्र पार्टी (रास्वपा) को उपसभापति बन्ने भएपछि चुनावी सरकारमा उनी बस्न मिल्ने कि नमिल्ने भन्ने विषयमा विवाद उठेको छ।

चुनाव गराउने उद्देश्यले मात्र गठन गरिएको राजनीतिक दलबिनाको अन्तरिम सरकारमा दलको पदाधिकारी बनेपछि मन्त्री पदमा रहन नहुने कतिपयको तर्क छ। यससँगै घिसिङले राजीनामा दिनुपर्ने कि नदिनुपर्ने विषयमा प्रधानमन्त्री सुशीला कार्कीमाथि समेत प्रश्न उठेको छ।

प्रधानमन्त्रीनिकट स्रोतका अनुसार उज्यालो नेपालको घोषणा सभामा जानुअघि नै घिसिङले प्रधानमन्त्री कार्कीलाई राजीनामा बुझाउने तयारी गरेका थिए। तर बाँकी रहेका केही महत्वपूर्ण काम सम्पन्न गरेपछि मात्र जान दिने भन्दै प्रधानमन्त्रीले त्यसबेला राजीनामा रोकिएको स्रोतले बताएको छ।

घिसिङ उज्यालो नेपाल पार्टीमा औपचारिक पदमा नरही संरक्षकका रूपमा मात्र रहेका थिए। तर हाल रास्वपामा उपसभापति बन्ने गरी सहमति पत्रमा हस्ताक्षर गरिसकेका छन्।

प्रधानमन्त्रीनिकट स्रोतका अनुसार हालसम्म घिसिङको राजीनामाबारे औपचारिक छलफल भने भएको छैन।
‘कुलमानजी चुनाव लड्ने तयारीमा हुनुहुन्छ भन्ने कुरा सरकारमा आउँदा नै थाहा थियो। उहाँको नियुक्ति पनि केही समयका लागि मात्रै भएको हो। एक महिनाअघि राजीनामाको कुरा उठ्दा प्रधानमन्त्रीले रोकेकी थिइन्, अहिले भने यसबारे कुरा भएको छैन,’ स्रोतले भन्यो।

स्रोतका अनुसार घिसिङ सरकारबाट बाहिरिने सम्भावनालाई मध्यनजर गर्दै प्रधानमन्त्री कार्कीले केही समय परराष्ट्र मन्त्रालय आफैँसँग राखेकी थिइन्। हालै पूर्व रथी बालानन्द शर्मा परराष्ट्र मन्त्री नियुक्त भइसकेका छन्।

यता कुलमान घिसिङ निकट स्रोतले भने हाल राजीनामाको विषयमा खासै छलफल नभएको जनाएको छ।