देउवाको छलफलमा नजाने गगन, विशेष महाधिवेशनको प्रतिवेदन बनाउन धुलिखेल प्रस्थान

---

काठमाडौं ।

नेपाली कांग्रेसका सभापति शेरबहादुर देउवाले छलफलका लागि बोलाए पनि महामन्त्री गगन थापा सहभागी नहुने भएका छन्। उनी विशेष महाधिवेशनको प्रतिवेदन तयार गर्न काभ्रेको धुलिखेल जाने तयारीमा छन्।

महामन्त्री थापाका स्वकीय सचिव शंकर कुइकेलका अनुसार थापा बिहीबार साढे ४ बजे धुलिखेल जाने पूर्वनिर्धारित तालिकामा छन्। ‘विशेष महाधिवेशनको प्रतिवेदन तयार पार्न २–४ दिन धुलिखेल जाने कार्यक्रम पहिल्यै तय थियो,’ कुइकेलले बताएका छन्। प्रतिवेदन तयार भएपछि मात्र थापा काठमाडौं फर्किनेछन्।

यता विशेष महाधिवेशन पक्षधर नेताहरूले पुस २७ र २८ गतेका लागि हल बुकिङ गरिसकेको कांग्रेस केन्द्रीय सदस्य अजयबाबु सिवाकोटीले जानकारी दिएका छन्।

गत असोज २९ गते ५४ प्रतिशत महाधिवेशन प्रतिनिधिको हस्ताक्षरसहित विशेष महाधिवेशन बोलाउन प्रस्ताव दर्ता भएको थियो। कांग्रेस विधानअनुसार प्रस्ताव दर्ता भएको तीन महिनाभित्र विशेष महाधिवेशन गर्नुपर्ने व्यवस्था छ।

यसअघि मंसिर १५ मा केन्द्रीय कार्यसमिति बैठकले पुस २६ देखि २८ गतेसम्म नियमित महाधिवेशन गर्ने निर्णय गरेको थियो। तर नियमित महाधिवेशन नहुने निश्चित भएपछि विशेष महाधिवेशनको विषय पुनः चर्किएको हो।

विवाद चुलिँदै गएपछि सभापति देउवाले आज साँझ ५ बजे महाराजगञ्जस्थित निवासमा महामन्त्रीद्वय गगन थापा र विश्वप्रकाश शर्मालाई छलफलका लागि बोलाएका थिए। देउवाले यसअघि उपसभापति पूर्णबहादुर खड्का र नेता रमेश लेखकसँग पनि परामर्श गरेका थिए।