२६ पुष २०८२, शनिबार ०८:३२
काठमाडौं । राष्ट्रिय स्वतन्त्र पार्टी (रास्वपा) सँग एकताको घोषणा गरेलगत्तै कुलमान घिसिङ नेतृत्वको उज्यालो नेपाल पार्टीभित्र गहिरिँदो असन्तुष्टि सतहमा आएको छ। सैद्धान्तिक मतभेद, पदीय भागबण्डा र पूर्वसहमति कार्यान्वयनको विषयले पार्टीभित्र आन्तरिक तनाव चर्किएको हो।
संघीयता र धर्मनिरपेक्षता जस्ता संवेदनशील मुद्दामा स्पष्ट सहमति नजुट्दै एकताको प्रक्रिया अघि बढाइएको भन्दै उज्यालो नेपालका नेताहरूले रास्वपा नेतृत्वको व्यवहारप्रति गम्भीर आपत्ति जनाएका छन्। एकतापछि आफूहरूलाई दोस्रो दर्जाको व्यवहार गरिएको अनुभूति भएको उनीहरूको भनाइ छ।
केन्द्रीय कमिटी बैठकमा आक्रोश
यसैबीच, उज्यालो नेपाल पार्टीको केन्द्रीय कमिटी बैठक बिहीबार काठमाडौंको बौद्धस्थित एक होटलमा बसेको छ। बैठकमा पार्टी अध्यक्ष कुलमान घिसिङले रास्वपा सभापति रवि लामिछानेसँग बिहान भएको छलफलको विवरण प्रस्तुत गरेका थिए।
घिसिङले एकताका बेला भएको सहमति कार्यान्वयनमा रास्वपा नेतृत्व इमानदार नदेखिएको निष्कर्ष सुनाउँदै केन्द्रीय सदस्यहरूलाई ब्रिफिङ गरेका हुन्। उनका अनुसार रवि लामिछाने व्यक्तिगत रूपमा सकारात्मक देखिए पनि पार्टीको सचिवालय र तथाकथित ‘कोर टिम’ सहमतिप्रति गम्भीर नदेखिएको आन्तरिक मूल्यांकन बैठकमा प्रस्तुत गरिएको थियो।
भागबण्डामा विवाद उत्कर्षमा
स्रोतका अनुसार, एकता प्रक्रियाका क्रममा उज्यालो नेपाललाई
– प्रत्यक्षतर्फ ३० प्रतिशत उम्मेदवारी
– २६ जना केन्द्रीय सदस्य
– समानुपातिकतर्फ १८ जना उम्मेदवार
दिने प्रारम्भिक समझदारी भएको थियो। तर हाल सार्वजनिक गरिएको सूचीमा समानुपातिकतर्फ १४ जनाको मात्र नाम समावेश गरिएको र पहिल्यै सांसद बन्ने निश्चित मानिएका ६ जनाको क्लस्टरसमेत हटाइएको भन्दै उज्यालो नेपाल पक्ष असन्तुष्ट बनेको छ।
निर्वाचन आयोगमा ५१ जना सदस्य अद्यावधिक भइसकेको र ९४ सदस्यीय केन्द्रीय कमिटी रहेको उज्यालो नेपालका अधिकांश केन्द्रीय सदस्यहरूले वर्तमान अवस्थामै एकता अघि बढाउन नसकिने स्पष्ट धारणा राखेका छन्।
‘ठूलो पार्टी’ को व्यवहार ?
बैठकमा रास्वपाले ठूलो पार्टीको हैसियत देखाउँदै एकताका साझेदारलाई अपमान गरेको आरोपसमेत उठेको छ। आफ्ना उम्मेदवारहरूको नाम काटिएको र पूर्वसहमति उल्लंघन गरिएको भन्दै नेताहरूले तीव्र असन्तोष पोखेका छन्।
उज्यालो नेपालका नेताहरूले पार्टीको प्रतिष्ठा, कार्यकर्ताको मनोबल र आगामी निर्वाचनको तयारीलाई ध्यानमा राख्दै अब स्पष्ट र ठोस निर्णय लिनुपर्ने निष्कर्ष निकालेका छन्।
एकता राजनीतिक मजबुरी कि दीर्घकालीन सहकार्य ?
यो प्रश्नसँगै उज्यालो नेपाल–रास्वपा एकताको भविष्य थप अनिश्चित बन्दै गएको देखिन्छ।
प्रतिकृया दिनुहोस्