बालेन झापा–५ आए पनि ओलीको जित अझ फराकिलो हुने एमालेको दाबी

---

नेकपा (एमाले) झापाका अध्यक्ष प्रेम गिरीले आगामी प्रतिनिधिसभा निर्वाचनमा झापा क्षेत्र नम्बर–५ बाट पार्टी अध्यक्ष केपी शर्मा ओली झन् ठूलो मतान्तरका साथ विजयी हुने दाबी गरेका छन्।

काठमाडौं महानगरपालिकाका मेयर बालेन्द्र शाह (बालेन) झापा–५ बाट उम्मेदवार बन्ने चर्चा चलिरहेका बेला गिरीले यस्तो प्रतिक्रिया दिएका हुन्। उनका अनुसार बालेन चुनावी मैदानमा आए पनि त्यसले ओलीको जितमा कुनै असर नपर्ने उल्टै मतान्तर बढ्नेछ।

एमालेले आगामी फागुन २१ गते हुने प्रतिनिधिसभा निर्वाचनका लागि ओलीलाई झापा–५ बाट एकल उम्मेदवारका रूपमा सिफारिस गरिसकेको छ।

गिरीले भने, ‘बालेन झापा–५ मा आए पनि एमालेका लागि फरक पर्दैन। पपुलिस्ट नाराका भरमा बाहिरको भूगोलमा आएर चुनाव जित्न सजिलो हुँदैन। यहाँ जनताले काम हेरेर मत दिन्छन्।’

उनले बालेन झापाबाट उम्मेदवार बन्ने सम्भावनामा समेत आफूलाई विश्वास नरहेको बताए। ‘आइहाले पनि परिणाम बदलिँदैन,’ गिरीको भनाइ छ।

गिरीले कुलमान घिसिङ र बालेन शाहलाई अदृश्य शक्तिले राष्ट्रिय स्वतन्त्र पार्टी (रास्वपा) सँग जोड्न खोजेको दाबी पनि गरे। उनका अनुसार रास्वपाले बालेनलाई मनदेखि स्वीकार गर्न नसक्ने अवस्था छ।

‘रास्वपाले बालेनको राजनीति झापाबाटै समाप्त गर्ने रणनीति बनाएको देखिन्छ,’ उनले भने, ‘क्षेत्रमै पनि रास्वपाका कार्यकर्ताले बालेनलाई स्वीकार गर्न सक्दैनन्।’

बालेनलाई प्रधानमन्त्रीको रूपमा अघि सारिएको घोषणासमेत रास्वपालाई मन नपरेको गिरीको दाबी छ। ‘रास्वपा निर्माण गर्न रवि लामिछानेसहितका नेता–कार्यकर्ताले दुःख गरेका छन्। प्रधानमन्त्री अर्कै बनाउने कुरा स्वीकार्य हुँदैन,’ उनले भने।

पूर्वप्रधानमन्त्रीसमेत रहेका ओलीलाई कमजोर देखाउन बालेनलाई अघि सारिएको हुनसक्ने संकेत गर्दै गिरीले झापा–५ मा एमाले संगठनको बलमा ओली अत्यधिक मतका साथ विजयी हुने ठोकुवा गरे।

उनका अनुसार विकास निर्माणका कामप्रति क्षेत्रका मतदाता सन्तुष्ट छन् र बाहिरबाट आउने ‘टुरिस्ट उम्मेदवार’ का कारण ओलीलाई चुनाव जित्न झनै सहज हुनेछ।

२०७९ सालको निर्वाचनमा ओली झापा–५ बाट २८ हजार ५७६ मतान्तरले निर्वाचित भएका थिए। उक्त निर्वाचनमा उनले ५२ हजार ३१९ मत प्राप्त गर्दा नेपाली कांग्रेसका खगेन्द्र पाण्डव अधिकारीले २३ हजार ७४३ मत पाएका थिए। रास्वपाका उम्मेदवार सुरेशकुमार पोखरेलले ११ हजार ७४८ मत प्राप्त गरेका थिए।