बालेन शाहसँग आर्थिक सुधारबारे गहिरो छलफल जारी छ : स्वर्णिम वाग्ले

---

काठमाडौँ ।

राष्ट्रिय स्वतन्त्र पार्टी (रास्वपा) का उपसभापति स्वर्णिम वाग्लेले पार्टीका वरिष्ठ नेता तथा प्रस्तावित प्रधानमन्त्री बालेन्द्र शाह (बालेन) सँग आर्थिक सुधारसम्बन्धी गहिरो छलफल भइरहेको बताएका छन्। आर्थिक वृद्धि, रोजगारी सिर्जना, राजस्व व्यवस्थापन, सरकारी खर्च नियन्त्रण, आधुनिक पूर्वाधार तथा महानगरको सेवा प्रवाह मोडल मुख्य छलफलका विषय बनेका छन्।

वाग्लेले बिहीबार सामाजिक सञ्जालमा तस्बिरसहित धारणा सार्वजनिक गर्दै बालेनसँग ‘उन्नयनको आसन्न अध्याय’ शीर्षकअन्तर्गत चरणबद्ध छलफल अघि बढिरहेको जानकारी दिएका हुन्। उनका अनुसार यी छलफलहरू आगामी चुनावपछि मुलुकको आर्थिक दिशानिर्देशन तय गर्ने आधार बन्नेछ।

यसै क्रममा रास्वपाले चुनावी गतिविधि तीव्र पार्दै माघ ५ गते मधेसबाट अभियान सुरु गर्ने तयारी गरेको छ। उपसभापति वाग्लेले सभापति रवि लामिछानेसहित जनकपुर जाने कार्यक्रम तय भइसकेको बताएका छन्। उनका शब्दमा, देश निर्माण र राजनीतिक निकासको अभियान मधेसबाट सुरु भएर फागुन २१ को निर्वाचनमार्फत निर्णायक चरणमा पुग्नेछ।

काठमाडौँ महानगरपालिकाका मेयरसमेत रहेका बालेन आगामी प्रतिनिधिसभा निर्वाचनपछि संसदीय दलको नेता हुँदै प्रधानमन्त्रीको उम्मेदवार बन्ने सर्तसहित रास्वपामा समाहित भएका हुन्। औपचारिक रूपमा केन्द्रीय सदस्य भए पनि पार्टीले उनलाई सभापति रवि लामिछानेपछि वरीयतामा राख्दै वरिष्ठ नेताको जिम्मेवारी दिएको छ।

स्वर्णिम वाग्लेको पछिल्लो अभिव्यक्ति केही दिनअघि सभापति लामिछानेले सार्वजनिक कार्यक्रममा दिएको ‘आगामी आर्थिक वर्षको बजेट लेख्न थाल्नूस्’ भन्ने भनाइसँग पनि जोडिएर हेरिएको छ। यसले रास्वपाभित्र बालेनलाई आर्थिक नीतिको प्रमुख अनुहारका रूपमा अघि सार्ने संकेत गरेको राजनीतिक वृत्तको विश्लेषण छ।