अन्तरिम सरकार निष्पक्ष भएर चुनाव गराउँछ : गृहमन्त्री अर्याल

---

काठमाडौं । गृहमन्त्री ओमप्रकाश अर्यालले अन्तरिम सरकार पूर्ण रूपमा निष्पक्ष र तटस्थ रहेर निर्वाचन सम्पन्न गर्न प्रतिबद्ध रहेको स्पष्ट पारेका छन्। मंगलबार गृह मन्त्रालयमा आयोजित पत्रकार सम्मेलनमा बोल्दै उनले सरकार कुनै पनि राजनीतिक दल वा समूहको पक्षमा नलाग्ने बताएका हुन्।

उनका अनुसार सरकारको एकमात्र प्राथमिकता सुशासन र निष्पक्ष निर्वाचन हो। संवैधानिक व्यवस्था अनुसार संसद् विघटन भएको ६ महिनाभित्र चुनाव गरिसक्नुपर्ने भएकाले सरकार सोही मार्गमा अघि बढिरहेको उनले बताए।

गृहमन्त्री अर्यालले सबै सरोकारवालाको विश्वास जित्दै निर्वाचन सम्पन्न गरी निर्वाचित सरकारलाई सत्ता हस्तान्तरण गर्ने लक्ष्य सरकारको रहेको उल्लेख गरे।

आगामी फागुन २१ गते तय भएको निर्वाचन मिति कुनै हालतमा नसर्ने दोहोर्‍याउँदै उनले मौसमजन्य कारण, विशेषगरी हिमपातजस्ता समस्याले केही स्थानमा मतदान स्थगित हुनसक्ने सम्भावना भने रहन सक्ने बताए। यस्ता घटना विगतका निर्वाचनमा पनि देखिएकाले यसलाई असामान्य विषयका रूपमा लिन नहुने उनको भनाइ छ।

‘यो चुनावी सरकार हो र चुनावी सरकारले निष्पक्ष हुनैपर्छ,’ मन्त्री अर्यालले भने, ‘हामी सुशासन बाहेक अरु कुनै पक्षमा छैनौँ। सुशासनको पक्ष लिनुलाई पक्षधरता भन्न मिल्दैन। राजनीतिक विषयमा सरकार कसैको पक्षमा उभिँदैन।’

उनले निष्पक्षता र तटस्थताको प्रत्याभूति दिँदै सरकार सबैको विश्वासका साथ निर्वाचन प्रक्रिया सफल बनाउने दिशामा अघि बढ्ने प्रतिबद्धता व्यक्त गरे।