काठमाडौं। निर्वाचन आयोगले निर्वाचन आचारसंहिता उल्लङ्घन भएको भन्दै थप नौ जना व्यक्ति तथा उम्मेदवारसँग स्पष्टीकरण माग गरेको छ। यससँगै आयोगले हालसम्म माग गरेका स्पष्टीकरणको संख्या २९ पुगेको छ।
आयोगका सहायक प्रवक्ता कुलबहादुर जिसीका अनुसार बाजुराबाट राष्ट्रिय स्वतन्त्र पार्टी (रास्वपा) का उम्मेदवार हेमराज थापामाथि बाग्मती प्रदेशका मुख्यमन्त्री इन्द्रबहादुर बानियाँलाई लक्षित गरी अपमानजनक र धम्कीपूर्ण भाषा प्रयोग गरेको उजुरी परेको छ। उक्त अभिव्यक्ति सामाजिक सञ्जालमार्फत समेत सार्वजनिक गरिएको दाबी गरिएको छ।
थापालाई निर्वाचन आचारसंहिता, २०८२ का सम्बन्धित दफाहरूअनुसार तीन दिनभित्र आफ्नो धारणा र तथ्यसहित जवाफ दिन आयोगले निर्देशन दिएको छ। उजुरीमा आर्थिक स्रोत संकलन र प्रचारका क्रममा आचारसंहिताको पालना गरिएको थियो वा थिएन भन्ने विषय पनि समेटिएको छ।
यसैबीच, झापा–५ बाट उम्मेदवार बालेन्द्र शाह (बालेन) लाई आयोगले दोस्रोपटक स्पष्टीकरण सोधेको छ। सादा पोसाकका प्रहरीमार्फत मत मागिएको भन्ने श्रव्यदृश्य सामग्री प्राप्त भएपछि आयोगले त्यसबारे प्रस्ट्याउन निर्देशन दिएको हो। प्रचारका क्रममा शाहकी श्रीमतीसँग प्रहरी खटिएको विषयमा पनि आयोगले जानकारी माग गरेको छ।
त्यस्तै, सिन्धुपाल्चोक–१ मा निर्वाचन कार्यालय नजिकै पार्टीको चुनाव चिह्न रंग्याएको उजुरीपछि नेपाली कम्युनिष्ट पार्टी र सोही क्षेत्रका उम्मेदवार माधव सापकोटासँग पनि आयोगले जवाफ मागेको छ।
आयोगले निर्वाचनलाई लक्षित गर्दै भ्रामक वा अमर्यादित सामग्री प्रकाशन तथा प्रसारण गरेको भन्दै केही व्यक्ति र सञ्चारमाध्यमका विषयमा प्रेस काउन्सिल नेपाललाई कारबाहीका लागि पत्राचार गरेको जनाएको छ।
प्रवक्ता जिसीका अनुसार हालसम्म माग गरिएका २९ स्पष्टीकरणमध्ये १४ वटाको जवाफ प्राप्त भइसकेको छ, बाँकीको प्रक्रिया जारी छ।
सम्वन्धित समाचारहरु
प्रतिकृया दिनुहोस्