‘सबै पूर्वमन्त्री रास्वपातर्फ गएका होइनन्’ — प्रधानमन्त्री कार्कीको स्पष्टिकरण

---

काठमाडौं। प्रधानमन्त्री सुशीला कार्कीले आफ्नो नेतृत्वमा रहेको मन्त्रिपरिषद् राष्ट्रिय स्वतन्त्र पार्टी (रास्वपा)सँग जोडेर प्रचार गरिनु गलत भएको बताएकी छन्। सोमबार राष्ट्रिय सभा बैठकमा सम्बोधन गर्दै उनले पद छाडेका सबै मन्त्री रास्वपामा गएको भन्ने चर्चा निराधार भएको दाबी गरिन्।

प्रधानमन्त्रीका अनुसार हालसम्म केवल दुई जना मात्रै रास्वपामा आबद्ध भएका छन्। “सबै जना रास्वपामा गएका छैनन्। कुलमानजीको आफ्नै पार्टी छ, महावीर पुन त कुनै पार्टीमै छैनन्,” उनले स्पष्ट पारिन्।

उनले मन्त्री पदबाट बाहिरिएपछि आफूहरूको उनीहरूसँग नियमित सम्पर्क पनि नरहेको बताउँदै, मन्त्रिपरिषद्लाई रास्वपाको भनेर चित्रण गर्नु गलत भाष्य भएको टिप्पणी गरिन्।

प्रधानमन्त्री कार्कीले पार्टी रोज्ने निर्णय व्यक्तिगत अधिकार भएको उल्लेख गर्दै, को जाने र को नजाने भन्ने विषयमा पहिल्यै सबैसँग सोधपुछ गरिएको बताइन्। “नजानेहरू बसे, जानेहरू गए। अहिले हाम्रो उनीहरूसँग कुनै सम्पर्क छैन,” उनले भनिन्।

उनका अनुसार पछिल्लो समय जेनजी आन्दोलनको दबाब र व्यक्तिगत रुचिका कारण केहीले राजनीतिक बाटो परिवर्तन गरे पनि त्यसलाई समग्र मन्त्रिपरिषद्सँग जोडेर प्रचार गर्नु उचित नभएको उनको धारणा थियो।