चुनावी तयारीसँगै चितवन फर्किए रवि लामिछाने

---

चितवन। राष्ट्रिय स्वतन्त्र पार्टी (रास्वपा)का सभापति रवि लामिछाने स्वास्थ्य अवस्थामा सुधार आएपछि चितवन पुगेका छन्। बिहीबार दिउँसो बुद्ध एयरको उडानमार्फत भरतपुर आइपुगेका लामिछाने आगामी प्रतिनिधिसभा निर्वाचनको तयारीमा सक्रिय हुन चितवन आएका हुन्।

उनको सचिवालयका अनुसार लामिछानेले चितवन आइपुगेपछि लंकुस्थित लक्ष्मीनारायण मन्दिरमा स्वस्तिशान्ति पूजा गर्ने कार्यक्रम राखेका छन्। त्यसपछि उनी भरतपुरको विशालचोकस्थित आफ्नै निवास पुग्नेछन्।

खुट्टामा संक्रमण देखिएपछि केही समय काठमाडौंमै उपचार र आराम गरिरहेका लामिछाने फागुन २१ गते हुने निर्वाचनलाई लक्षित गर्दै आज पहिलोपटक चितवन फर्किएका हुन्। उनी यसपटक पनि चितवन निर्वाचन क्षेत्र नम्बर–२ बाट उम्मेदवार रहेका छन्।

यसअघि माघ ५ गते जनकपुरमा आयोजित कार्यक्रममा सहभागी हुने क्रममा उनको खुट्टामा चोट लागेको थियो। उपचारका लागि उनलाई त्रिभुवन विश्वविद्यालय शिक्षण अस्पतालमा भर्ना गरिएको थियो।