निर्वाचन सदाचार स्थापनाको अभियान बन्नुपर्छ : प्रधानमन्त्री कार्की

---

काठमाडौं। प्रधानमन्त्री सुशीला कार्कीले आगामी प्रतिनिधिसभा निर्वाचनलाई मुलुकमा सदाचार र सुशासन स्थापनाको अवसरका रूपमा लिनुपर्ने बताएकी छन्। अख्तियार दुरुपयोग अनुसन्धान आयोगको स्थापना दिवसका अवसरमा आयोजित कार्यक्रममा उनले यस्तो धारणा व्यक्त गरेकी हुन्।

उनका अनुसार निर्वाचन प्रक्रियामार्फत स्वच्छ छवि भएका, भ्रष्टाचारविरुद्ध स्पष्ट प्रतिबद्धता जनाएका जनप्रतिनिधि चयन हुनुपर्ने आवश्यकता छ। त्यसका लागि चुनावलाई नै नैतिकता र जवाफदेहिताको महाअभियानका रूपमा रूपान्तरण गर्नुपर्ने उनको भनाइ थियो।

प्रधानमन्त्री कार्कीले भ्रष्टाचार नियन्त्रणका लागि कानुनी र संस्थागत संरचना पर्याप्त भए पनि अपेक्षाकृत उपलब्धि हासिल हुन नसकेको स्वीकार गरिन्। यसमा कार्यकारी अंगकै जिम्मेवारी बढी हुने उल्लेख गर्दै उनले सुधारको पहल सरकारबाटै सुरु हुनुपर्ने बताइन्।

उनले जेनजी आन्दोलनपछिको जनभावनाअनुसार वर्तमान सरकारले प्रशासनलाई नागरिकमैत्री बनाउने र शासकीय सुधारलाई तीव्रता दिने प्रयास गरिरहेको दाबी गरिन्। साथै, आगामी सरकारलाई मार्गदर्शन गर्ने गरी सुशासनसम्बन्धी स्पष्ट कार्ययोजना तयार गर्ने काम अन्तिम चरणमा पुगेको पनि जानकारी दिइन्।

प्रधानमन्त्री कार्कीले चुनावपछि नयाँ जनादेशसहित आउने सरकारले भ्रष्टाचार नियन्त्रण र सुशासन प्रवर्द्धनमा थप सशक्त कदम चाल्ने विश्वास व्यक्त गरिन्।