काठमाडौं। कास्की जिल्ला अदालतले रवि लामिछाने विरुद्ध दायर संगठित अपराध र सम्पत्ति शुद्धीकरणसम्बन्धी मुद्दा तत्काल फिर्ता नहुने आदेश दिएको छ।
सोमबार न्यायाधीश नितिश राईको इजलासले सरकारी वकिल कार्यालयले पेस गरेको मुद्दा संशोधन तथा फिर्तासम्बन्धी निवेदनमाथि सुनुवाइ गर्दै यस्तो आदेश गरेको हो। अदालतले महान्यायाधिवक्ताको कार्यालयको निर्णयविरुद्ध सर्वोच्च अदालतमा रिट विचाराधीन रहेकाले सो सम्बन्धमा अन्तिम आदेश नआएसम्म मुद्दा फिर्ता गर्न नमिल्ने स्पष्ट पारेको छ।
अदालतको आदेशअनुसार सर्वोच्च अदालतबाट हुने निर्णय जिल्ला अदालतमा पेश भएपछि मात्रै थप निर्णय प्रक्रिया अघि बढ्नेछ।
यसअघि रूपन्देही जिल्ला अदालतले पनि लामिछानेविरुद्धको संगठित अपराध तथा सम्पत्ति शुद्धीकरण मुद्दा तत्काल फिर्ता नगर्ने निर्णय गरिसकेको थियो।
महान्यायाधिवक्ताको कार्यालयले गत पुस ३० गते लामिछानेसहितका प्रतिवादीविरुद्ध दायर उक्त मुद्दा फिर्ता लिने निर्णय गरेको थियो। सोही निर्णयका आधारमा कास्की जिल्ला सरकारी वकिल कार्यालयले अदालतमा निवेदन दर्ता गराएको थियो।
लामिछानेविरुद्ध कास्की, रूपन्देही, काठमाडौं र चितवन जिल्ला अदालतमा सहकारी ठगी, संगठित अपराध तथा सम्पत्ति शुद्धीकरणसम्बन्धी मुद्दा दायर रहेका छन्।
प्रतिकृया दिनुहोस्