काठमाडौं। Rastriya Swatantra Party (रास्वपा) ले बालेन शाहलाई संसदीय दलको नेता र भावी प्रधानमन्त्रीको उम्मेदवार बनाउने सहमति गरेपछि यसको कार्यान्वयनका लागि पार्टीको विधान संशोधन गर्नुपर्ने अवस्था देखिएको छ।
रास्वपाको विधानको धारा ६६ (८) अनुसार प्रतिनिधिसभा निर्वाचनअघि नै पार्टीका उम्मेदवारहरूबीच आन्तरिक निर्वाचन गराएर संसदीय दलको नेता चयन गर्नुपर्ने व्यवस्था छ। सो प्रक्रियामा पार्टीका सम्पूर्ण साधारण सदस्यहरूले मतदान गर्ने प्रावधान राखिएको छ।
विधानअनुसार कसरी चयन हुनुपर्थ्यो
विधानका मुख्य बुँदाअनुसार:
-
निर्वाचनअघि उम्मेदवारहरूबीच आन्तरिक निर्वाचन हुनुपर्ने
-
पार्टीका सबै साधारण सदस्य मतदाता हुने
-
कुल मतको ५०% + १ मत ल्याउने उम्मेदवार संसदीय दलको नेता बन्ने
-
कसैले बहुमत नल्याएमा शीर्ष दुईबीच पुनः मतदान हुने
तर बालेनको समूहसँग एकीकरण भएपछि रास्वपाले प्रत्यक्षतर्फको प्राइमरी इलेक्सन गर्न सकेन। समानुपातिकतर्फ पनि आंशिक मात्र प्राइमरी भएको थियो।
सहमतिमा बनेको नेतृत्व
पार्टीले आन्तरिक निर्वाचन नगरी सहमतिका आधारमा बालेनलाई संसदीय दलको नेता र प्रधानमन्त्रीको उम्मेदवार बनाएको छ। यसले विधानमा उल्लेखित प्रक्रिया पूरा नगरेकाले अब विधान संशोधन गरेर प्रक्रिया मिलाउनुपर्ने देखिएको छ।
रास्वपाका एक पदाधिकारीका अनुसार पहिलो महाधिवेशनअघि पार्टीको केन्द्रीय समितिले नै विधान संशोधन गर्न सक्ने व्यवस्था भएकाले बैठक बोलाएर संशोधन गर्ने विकल्प खुला छ।
संसदीय प्रणालीमा फरक अभ्यास
नेपालका अधिकांश दल तथा संसदीय प्रणाली भएका अन्य देशहरूमा चुनावपछि निर्वाचित सांसदहरूले नै संसदीय दलको नेता चयन गर्ने प्रचलन छ। तर रास्वपाले चुनावअघि नै साधारण सदस्यको मतबाट नेता चयन गर्ने प्रावधान राखेकाले व्यवहारिक कठिनाइ देखिएको विश्लेषण भइरहेको छ।
पार्टीभित्र बालेनलाई संसदीय दलको नेता बनाउने विषयमा खासै विवाद नभए पनि केन्द्रीय समिति बैठक कहिले बस्छ र बालेन स्वयं बैठकमा उपस्थित हुन्छन् वा हुँदैनन् भन्ने विषयमा भने अझै स्पष्टता आएको छैन।
प्रतिकृया दिनुहोस्