२० जेष्ठ २०८३, बुधबार १७:५८
धादिङको सिद्धलेक गाउँपालिका वडा नम्बर १ र ५ लाई जोड्ने कालिदह–कुम्पुर मोटरेबल पुल (थोपल खोला) अन्ततः निर्माण सम्पन्न भएको छ। २०७८ सालमा शिलान्यास गरिएको उक्त पुल निर्धारित १८ महिनाभित्र सम्पन्न हुनुपर्ने भए पनि विभिन्न प्राविधिक तथा प्राकृतिक चुनौतीका कारण लक्ष्यभन्दा झण्डै तीन वर्ष ढिलो गरी २०८३ साल जेष्ठ महिना निर्माण सम्पन्न भएको हो।
पुल निर्माण सम्पन्न भएसँगै स्थानीय बासिन्दाहरूमा खुसी छाएको छ। वर्षौँदेखि पुल अभावका कारण झोलुङ्गे पुल र जोखिमपूर्ण बाटो प्रयोग गर्न बाध्य स्थानीयहरू अब सहज आवतजावतको आशामा छन्। हाल पुलबाट मोटरसाइकल तथा दुईपाङ्ग्रे सवारीसाधन सञ्चालन हुन थालेका छन् भने ठूला सवारीसाधन सञ्चालनका लागि आवश्यक केही व्यवस्थापन कार्य बाँकी रहेको जनाइएको छ।
यस परियोजनाको ठेक्का सूर्य कन्स्ट्रक्सन प्रालि, पञ्चेश्वर कन्स्ट्रक्सन प्रालि र देवीनाथ कन्स्ट्रक्सन प्रालिको संयुक्त सहकार्य अन्तर्गत सञ्चालन गरिएको थियो। निर्माण कार्यका क्रममा विभिन्न चरणमा समस्या देखिएपछि परियोजना लामो समयसम्म विवाद र आलोचनाको केन्द्रमा रहेको थियो।
यसअघि Standard Khabar ले प्रकाशित गरेको समाचारमा पुल निर्माण अत्यन्त सुस्त भएको, स्थानीयले दशकौँदेखि भोग्दै आएको समस्या समाधान हुन नसकेको तथा सम्बन्धित निकायहरूको प्रभावकारी अनुगमन नभएको विषय उठाएको थियो। समाचार प्रकाशनपछि ठेकेदार कम्पनीका प्रतिनिधिहरूले परियोजनाको वास्तविक अवस्था सार्वजनिक गर्दै निर्माण कार्य अन्तिम चरणमा पुगेको बताएका थिए।
पञ्चेश्वर कन्स्ट्रक्सन प्रालिका सञ्चालक रूपचन्द्र लामिछानेले त्यसबेला निर्माण कार्यमा बर्खाका कारण बारम्बार क्षति पुगेको, खोलामा निर्माण कार्य सञ्चालन गर्न कठिन भएको तथा प्राविधिक चुनौतीहरूले काम ढिलो भएको बताएका थिए। उनले परियोजना सम्पन्न गर्ने प्रतिबद्धता व्यक्त गरेका थिए।
पुल निर्माण सम्पन्न भएसँगै सिद्धलेक गाउँपालिका वडा नम्बर ५ का बासिन्दाहरूले प्रत्यक्ष लाभ पाउने अपेक्षा गरिएको छ। पुल अभावका कारण वर्षौँदेखि कृषि उपज ढुवानी, विद्यार्थीको आवतजावत, बिरामीको उद्धार तथा दैनिक जनजीवन प्रभावित हुँदै आएको थियो।
स्थानीय बासिन्दाहरूका अनुसार अब पुल सञ्चालनमा आएसँगै गाउँको आर्थिक तथा सामाजिक गतिविधिमा सकारात्मक परिवर्तन आउने विश्वास गरिएको छ। यद्यपि पुलको औपचारिक उद्घाटन भने हालसम्म गरिएको छैन।
वर्षौँको प्रतीक्षा, पटक–पटकको आलोचना, स्थानीयको दबाब र निर्माण प्रक्रियामा देखिएका चुनौतीहरू पार गर्दै अन्ततः कालिदह–कुम्पुर मोटरेबल पुल निर्माण सम्पन्न भएको छ। अब स्थानीयको अपेक्षा भनेको पुलको पूर्ण सञ्चालन र दीर्घकालीन गुणस्तर सुनिश्चित गर्नु रहेको छ।
प्रतिकृया दिनुहोस्