७ बैशाख २०८२, आईतवार ०९:११
राष्ट्रिय प्रजातन्त्र पार्टी (राप्रपा)ले आइतबार सीमित नेताहरूको सहभागीता रहने गरी शान्तिपूर्ण प्रदर्शन गर्ने जनाएको छ। पार्टी अध्यक्ष राजेन्द्र लिङ्देनले निषेधित क्षेत्र तोड्ने भनिएको आन्दोलन शान्तिपूर्ण ढंगले हुने स्पष्ट पारेका छन्।
‘वैचारिक हिसाबले राप्रपा देशको प्रमुख प्रतिपक्षी पार्टी हो, हामी जे गर्छौं भनेरै गर्छौं, सरकारले नडराए हुन्छ,’ भन्दै अध्यक्ष लिङ्देनले सामाजिक सञ्जाल फेसबुकमा पोस्ट गरेका छन्।
उनले अहिलेको शासन प्रणालीलाई प्रजातन्त्र, लोकतन्त्र र गणतन्त्र भनिए पनि जनतालाई ‘यो मात्र बोल, यो बाटो मात्र हिँड’ भन्ने किसिमले सीमित गर्ने सरकारी निरंकुश प्रवृत्तिको विरोधमा गरिएको प्रदर्शनलाई प्रतीकात्मक र शान्तिपूर्ण भनेका छन्।
‘जहाँ हामी सीमित नेताहरू मात्रै सहभागी हुनेछौं,’ भनी लिङ्देनले बताएका छन्।
राप्रपाले आइतबार आफ्ना नेता–कार्यकर्तालाई काठमाडौंको बिजुलीबजार पुलमा भेला हुन आह्वान गरेको छ। त्यहाँबाट सहभागीहरूले निषेधित क्षेत्रतर्फ अघि बढ्ने योजना बनाएका छन्। सरकारले हाल बानेश्वर क्षेत्रलाई निषेधित क्षेत्र घोषणा गरेको छ।
यसैबीच, राप्रपाले आइतबार निषेधित क्षेत्र तोड्ने अभिव्यक्तिपछि गृह मन्त्रालयले गम्भीर ध्यानाकर्षण जनाएको छ।
गृह मन्त्रालयका प्रवक्ता रामचन्द्र तिवारीले शनिबार साँझ विज्ञप्ति जारी गर्दै राप्रपाको उक्त भनाइप्रति गम्भीर ध्यानाकर्षण भएको जनाएका छन्।
मन्त्रालयले यस्ता गतिविधि कानुन विपरीत हुने भन्दै त्यसअनुसार कारबाही हुने चेतावनी दिएको छ।
‘संविधानको उल्लंघन गर्न प्रेरित गर्ने र समाजमा अराजकता फैलाउने कुनै पनि गतिविधि सह्य हुने छैन,’ विज्ञप्तिमा उल्लेख छ।
‘यस्ता गतिविधिमा संलग्न हुने जोसुकैलाई कानुन बमोजिम कारबाही हुने व्यहोरा सूचित गरिन्छ। साथै समाजमा हिंसा फैलाउने कुनै पनि अराजक, उत्तेजक र गैरकानुनी क्रियाकलापमा संलग्न नहुन समेत गृह मन्त्रालय सबैमा अनुरोध गर्दछ,’ विज्ञप्तिमा भनिएको छ।
प्रतिकृया दिनुहोस्