चुनावी संशय हटाउन राष्ट्रपति सक्रिय, जेन–जी मुद्दासहित शीर्ष दलबीच संवाद

---

फागुन २१ मा तय भएको निर्वाचनलाई लिएर उठेको संशय हटाउन राष्ट्रपति रामचन्द्र पौडेलको मध्यस्थतामा शीर्ष राजनीतिक दलका नेताबीच संवाद सुरु भएको छ। शीतल निवासमा प्रधानमन्त्री सुशीला कार्की, एमाले अध्यक्ष केपी शर्मा ओली, कांग्रेस सभापति शेरबहादुर देउवा र नेकपा संयोजक पुष्पकमल दाहालबीच छलफल भएको हो।

छलफलमा तय मितिमै निर्वाचन गराउने वातावरण बनाउने, शान्ति–सुरक्षा कायम गर्ने र जेन–जी आन्दोलनपछि उत्पन्न असन्तुष्टि सम्बोधन गर्दै चुनावी वातावरण सहज बनाउने विषयमा जोड दिइएको छ। राष्ट्रपतिले संवेदनशील अवस्थामा निर्वाचन नै मुलुकको निकास भएको भन्दै मितिबाट दायाँबायाँ नलाग्न आग्रह गरेका छन्।

यसै क्रममा मन्त्रीहरूले प्रमुख दलका कार्यालय भ्रमण गरी जेन–जी आन्दोलनबाट भएको क्षति, असन्तुष्टि र चुनावी सहयोगबारे संवाद गरेका छन्। एमालेले सुरक्षा अवस्था र पार्टी अध्यक्षमाथि लगाइएको स्थानहद नहटे चुनाव सम्भव नहुने अडान राखेको छ भने नेकपाले चुनावका लागि सहयोग गर्ने प्रतिबद्धता जनाएको छ।

त्यसै दिन जाँचबुझ आयोगले केही पूर्व उच्च अधिकारीहरूको स्थानहद फुकुवा गरेपछि जेन–जी आन्दोलनसँग जोडिएका विषयमा सरकार केही लचिलो बनेको संकेत देखिएको छ।