१२ पुष २०८२, शनिबार १६:४४
काठमाडौं । प्रधानमन्त्री सुशीला कार्कीले प्रमुख तीन दलका शीर्ष नेताहरूलाई आगामी निर्वाचनमा सहभागी हुन आग्रह गरेकी छिन्। शनिबार बालुवाटारमा आयोजित छलफलमा नेपाली कांग्रेसका सभापति शेरबहादुर देउवा, नेकपा एमालेका अध्यक्ष केपी शर्मा ओली र नेकपा (माओवादी केन्द्र)का संयोजक पुष्पकमल दाहाल ‘प्रचण्ड’लाई उनले चुनावी निम्तो दिएकी हुन्।
छलफलको सुरुआतमा प्रधानमन्त्री कार्कीले आफ्नो निमन्त्रणालाई स्वीकार गर्दै बालुवाटार आएकोमा तीनै नेताप्रति धन्यवाद व्यक्त गरिन्। उनले आफू न्याय क्षेत्रको व्यक्ति भए पनि राष्ट्रपतिबाट निर्वाचन गराउने जिम्मेवारी पाएकाले सरकार निर्वाचनको तयारीमा केन्द्रित रहेको बताइन्।
‘यो घर तपाईंहरूकै हो। म त न्याय क्षेत्रको मान्छे हुँ। राष्ट्रपतिज्यूबाट चुनाव गराउने कार्यादेश पाएबमोजिम हामी तयारीमा जुटेका छौँ,’ प्रधानमन्त्री कार्कीले भनिन्।
प्रधानमन्त्रीले निर्वाचनलाई प्राथमिकता दिन रक्षाबाहेक आफूसँग रहेका सबै मन्त्रालयको जिम्मेवारी अन्य मन्त्रीहरूलाई हस्तान्तरण गरिसकेको जानकारी पनि गराइन्। ‘प्रशासनिक काम–कारबाहीबाट अलग भएर पूरै निर्वाचनमा होमिन मैले यो निर्णय गरेकी हुँ,’ उनले स्पष्ट पारिन्।
‘मैले यहाँहरूलाई बोलाएर बिन्ती गर्न खोजेको कुरा के हो भने, यो निर्वाचन जसरी पनि सफल पारौँ। सबै दलको सहभागिता अनिवार्य छ,’ प्रधानमन्त्री कार्कीले भनिन्, ‘तपाईंहरू निर्वाचनका लागि तयार हुनुहुन्छ भन्ने वातावरण देखिन थालेको छ, यो स्वागतयोग्य छ।’
छलफलमा प्रधानमन्त्रीले निर्वाचन आयोग र सुरक्षा निकायलाई आवश्यक स्रोतसाधन उपलब्ध गराइसकेको जानकारी दिँदै सुरक्षाकर्मीको मनोबल पनि बढेको दाबी गरिन्। ‘सुरक्षाकर्मीको मनोबल बढेको कुरा यहाँहरूले पनि महसुस गर्नुभएको होला,’ प्रधानमन्त्रीको सचिवालयले उनको भनाइ उद्धृत गरेको छ।
अन्त्यमा प्रधानमन्त्री कार्कीले कुनै अन्योल नगरी राष्ट्रको भविष्य सम्झेर स्थिर र दिगो लोकतन्त्रका लागि निर्वाचन सफल पार्न तीनै दलका नेतालाई आग्रह गरिन्। ‘यो हामी सबैको साझा जिम्मेवारी हो। यही अनुरोध गर्न मैले आज यहाँहरूलाई निम्ता गरेकी हुँ,’ उनले भनिन्।
प्रतिकृया दिनुहोस्